ନୂଆଦିଲ୍ଲୀ,୧୪।୦୬: ଆମେରିକାରେ ଆଇଫୋନ ବନାଇବା ଲାଗି ଆପଲକୁ ଟ୍ରମ୍ପ ଧମକ ଦେବା ସତ୍ତ୍ବେ ମଧ୍ୟ ସେହି ଦେଶରେ ବିକ୍ରି ହେଉଥିବା ପ୍ରାୟ ଫୋନ ଭାରତରେ ପ୍ରସ୍ତୁତ ହେଉଛି । ରିପୋର୍ଟ ମୁତାବକ, ଆପଲ୍ ମାର୍ଚ୍ଚରୁ ମେ ୨୦୨୫ ମଧ୍ୟରେ ଭାରତରୁ ଯେତେ ଆଇଫୋନ ରପ୍ତାନି କରିଛି ତାର ୯୭% ଆମେରିକା ଯାଇଛି । ଏହାର ମୂଲ୍ୟ ପ୍ରାୟ ୩.୨ ବିଲିୟନ ଡଲାର (୨୭ ହଜାର କୋଟି ଟଙ୍କା) ରହିଛି । ମେ ମାସରେ କେବଳ ୧ ବିଲିୟନ ଡଲାର ବା ୮୬୦୦ କୋଟିର ଆଇଫୋନ ଭାରତରୁ ଆମେରିକା ଯାଇଛି ।
ଏହାକୁ ଦେଖିଲେ ଏବେ ଆପଲ ଆମେରିକା ବଜାର ଲାଗି ଭାରତରୁ ହିଁ ସ୍ୱତନ୍ତ୍ର ଭାବେ ଆଇଫୋନ ପ୍ରସ୍ତୁତ କରୁଛି । ୨୦୨୫ ଜାନୁଆରିରୁ ମେ ମଧ୍ୟରେ ଭାରତରୁ ଆମେରିକାକୁ ୪.୪ ବିଲିୟନ ଡଲାର (୩୭ ହଜାର କୋଟି)ର ଆଇଫୋନ ରପ୍ତାନି ହୋଇଛି । ୨୦୨୪ ସମାନ ଅବଧିରେ ଏହା ୩.୭ ବିଲିୟନ ଡଲାର ତୁଳନାରେ ଅଧିକ । ୨୦୨୪ ସୁଦ୍ଧା ଆମେରିକାରେ ବିକ୍ରି ହେଉଥିବା ୫୦% ଆଇଫୋନ ଭାରତରେ ପ୍ରସ୍ତୁତ ହୋଇଥିଲା । ଡୋନାଲ୍ଡ ଟ୍ରମ୍ପ ୨୩ ମେରେ କହିଥିଲେ, ଆମେରିକାରେ ବିକ୍ରି ହେବାକୁ ଥିବା ଆଇଫୋନ ଭାରତ କିମ୍ବା ଅନ୍ୟ କୌଣସି ଦେଶରେ ନୁହେଁ ଆମେରିକାରେ ହିଁ ପ୍ରସ୍ତୁତ ହେବା ଆବଶ୍ୟକ । କମ୍ପାନି ଯଦି ଆମେରିକାରେ ଆଇଫୋନ ନ ବନାଏ ତେବେ ଏହା ଉପରେ ଅନ୍ତତଃ ପକ୍ଷେ ୨୫% ଟିକସ ଲାଗୁ କରିବାକୁ ସିଇଓ ଟିମ୍ କୁକଙ୍କୁ ଚେତାଇ ଦେଇଥିଲେ ।
ତେବେ ଏବେ ବର୍ତ୍ତମାନ ଆପଲ ଭାରତ ଉପରେ ଫୋକସ କରିଛି । ଚୀନ ବଜାର ପରିବର୍ତ୍ତେ ଭାରତ ଉପରେ ଏବେ ସପ୍ଲାଇଚେନକୁ ସ୍ଥାନାନ୍ତର କରିଛି କମ୍ପାନି । ଉତ୍ପାଦନ ସଂଯୁକ୍ତ ପ୍ରୋତ୍ସାହନ (ପିଏଲ୍ଆଇ) ସ୍କିମ ଯୋଗୁ ଆପଲକୁ ଫୋନ ଯୋଗାଉଥିବା କମ୍ପାନିଗୁଡ଼ିକ ଭାରତ ବଜାର ପାଇଁ ବେଶ ଉତ୍ସାହୀ ହୋଇଛନ୍ତି । ଭାରତ ବିଶ୍ୱର ଦ୍ରୁତ ଅଭିବୃଦ୍ଧିଶୀଳ ସ୍ମାର୍ଟଫୋନ ବଜାର ଭାବେ ଉଭା ହୋଇଛି । କୁଶଳୀ ଶ୍ରମଶକ୍ତି, ଭିତ୍ତିଭୂମି ଏବଂ ରପ୍ତାନିର ଉନ୍ନତ ସୁଯୋଗ ସୃଷ୍ଟି ହୋଇଥିବାରୁ ଭାରତ ବଜାର ଉପରେ କମ୍ପାନି ଧ୍ୟାନ କେନ୍ଦ୍ରିତ କରିଛି ।
